噚日舉行嘅日聯盃第二圈分組賽爆到七彩，名古屋鯨魚、柏雷素爾同川崎前鋒都喺被睇好之下主場輸波，其中前鋒仲非常樣衰，迎戰之前未贏過嘅福岡黃蜂竟然輸0:1。不過，神戶勝利船就「弗」到漏油，主場面對名牌球隊鹿島鹿角，憑柏度祖尼亞梅開二度，加埋渡邊千真同相馬崇人各入一球而輕鬆贏4:1，分組賽兩戰全勝兼喺近五場比賽贏四場；而柏度祖尼亞亦腳風甚順，開季至今上陣六場入咗五球咁多。