【科技籽：玩物達人】
Samsung S7推出不久，iPhone SE隨即接力上場，科技日新月異，其實除了追趕新鮮事物，仍有人難捨舊式電子產品。他們不只收集舊物，還會想方設法，為它們重新注入生命力，睇得又用得。葉國興「肢解」陳年舊鏡套入現代相機；張偉明把紅白遊戲機改成HDMI輸出，飛甩雪花高清化繼續打；八十後設計師張瑋晉（Kevin）則全職廢物利用、創製新品。三個人三對手，卻在努力施展同樣的魔法。
放映電影鏡頭 移植中片幅相機
人稱葉Sir的葉國興，17年前開始改鏡，笑言沒作統計，但按目前月改20至30支來看，無論如何也超過4,000支吧。「改鏡幾十年前都有人玩，當年我用Canon EOS相機，買咗套DKL接環鏡頭，但有人改Nikon就冇人改Canon，咁我咪試下自己改囉。」談到當年如何學會箇中技巧，葉Sir卻說：「其實玻璃嘅光學理論同機械物理，中學都學過晒啦，大家唔記得咗箒！至於用乜工具同乜手勢最好，就靠累積經驗囉。」
無反相機普及之後，加轉接環來玩舊鏡已十分平常，要葉Sir改造的多是更偏門的類型，例如本來不是用在相機的鏡頭，「近嚟比較多人改『電影放頭』 ，呢啲鏡本來係畀戲院播放電影，質素好高，但因為放映制式同器材經常要升級，所以會平價放出。連埋改鏡成本，三千幾嘅電影放頭解像度已經好犀利，好過好多同級鏡頭。」不過葉Sir只改不賣，這類電影放頭亦較難在香港買到，影友多數要到外國網站如eBay搜購。同行的攝影師親自試用，發現以電子觀景器對着恤衫拍攝可看到俗稱「撞網」的波紋，這一情況只出現在解像度很高的鏡頭。說到怪鏡頭，葉Sir手上還有一支蘇聯米格偵察機用的鏡頭，改造後可配搭中片幅相機。
「最開心係發掘到獨一無二嘅個性」
改鏡頭最主要的工夫有兩部份：改接環及調焦距，葉Sir指改接環不難學，快則2小時、慢則20小時，調焦距則靠經驗，最重要是遷就鏡頭特性和用家喜好，「舊鏡嘅最近對焦距離多數較遠，但多數嘅人都鍾意影close up、影靚散景，我會盡量加長焦筒改短最近對焦，會諗定幾個選擇畀鏡主。」改鏡收費因需求而定，$650起，附加功能額外收費，一般不會超過$2,500。因為改鏡一定帶有風險，故不建議改太貴、太罕有的鏡頭，「改鏡最開心係發掘到獨一無二嘅鏡頭個性，要有冒險心態，貴鏡正正經經去影都夠靚，唔好改喇！」
紅白機 天線變HDMI輸出
Daniel自小便跟電視遊戲結緣，童年愛玩紅白機，長大後也曾在遊戲機公司任職，負責設計街機機台，因而熟知遊戲機的結構，但其實改機的原意也是為了玩，「儲落十幾部舊機，有日屋企人話啲機都唔玩得，不如丟咗佢，我當然唔肯啦，但又覺得擺喺度好浪費。以前啲game咁好玩，諗諗吓不如改機等佢哋喺𠵱家嘅電視度都玩到。」約一年前，他與朋友開設Restart Workshop，售賣和改裝舊遊戲機，想讓童年回憶restart重生，其中最受歡迎的是把舊遊戲機改作HDMI等現代輸出。主因是舊機如紅白機等用料一般，尤其天線十之八九會有老化，畫面必定漫天雪花，HDMI版能提升色彩表現，而且不會霸佔電視的天線插槽，看電視也不用換線。
開始改機後，Daniel發現很多舊機迷也有復活夢，除了改HDMI，更多人嘗試復活家中早已壞掉的珍藏，「好多人都有保留呢啲童年回憶，雖然改機係生意，但宗旨都係幫機迷，唔同要求都會試吓。」一般來說，改HDMI輸出收費$500，其他改裝則視乎手工、用料，多數不會過千。現場所見，有Neo Geo、Dreamcast等不同年代的遊戲機待改，不少連包裝盒也保存得很好，「雖然流行模擬器，但用機打感覺唔同，同埋部機玩到，另一半、屋企人就唔會話阻碇啦！」
醋樽變喇叭 擰蓋校音量
不要以為只有年紀大的人才鍾情舊物，29歲的Kevin五年前已開始以廢棄物料來設計產品，首件作品是把醋樽改造成喇叭。當年大學畢業後，Kevin到電池公司擔任產品設計師，專門設計喇叭，但他認為職場生涯與他所學相距甚遠，「讀書嗰陣老師教產品設計係改善問題，不過做咗三年，設計要跟足規格，我嘅工作只係畫個模出嚟。有一日要做一個空間係5公升嘅喇叭，經過糧油舖發覺醋樽都咁啱係5公升，我就用公餘時間做咗boombottle出嚟。」創作過後，Kevin更覺電子產品壽命有限，很多用品幾年後就變垃圾，很想找出一個新的設計模式。於是四年前開始全職做升級再造（upcycling）的工作，跟回收再造（recycling）不同，Kevin的宗旨是不破壞物料原有的特性去設計新產品，所需資源及人力較少，舊水樽用來做喇叭、樽蓋用來調校音量、舊地毯則用來做電腦袋。
香港人製造垃圾的能力世界知名，2014年於堆填區棄置的都市固體廢物平均每日約有9,782公噸，偏偏廢物處理政策卻似有倒退，例如屯門的家電再生中心將於10月關閉。想盡一分力支持upcycling的話，可到Kevin工作的灣仔聖雅各福群會賽馬會升級再造中心，內有多位本地upcycling工作者的工作室，除了售賣成品，也會免費提供原料，鼓勵市民自行創作。愛批評的人或會說三個個案皆是一門生意，但記者覺得始終是一門有心人才做得來的生意。
記者：司徒港燊
攝影：林栢鈞、楊錦文
編輯：陳國棟
美術：孔文彬