近月唔少學生輕生，財政司司長曾俊華喺網誌藉已故著名體育記者伍晃榮嘅名句「波係圓嘅」勉勵學生，話任何比賽都唔會有永遠嘅underdog（下風者）、唔會有永遠解決不了嘅困難，提醒學生喺挫折中吸取經驗，困難後會有新氣象。
讚港足創近年佳績
鬍鬚曾話，對近日學生輕生事件感到難過同痛心，強調人生唔係比賽，除咗學業，仲有其他值得體驗嘅事情同目標。佢提醒學生遇到解決唔到嘅問題時，可以暫停一下，好似比賽嘅time out咁紓緩壓力，要明白自己唔係獨行，身邊人一定願意聆聽。
港足早前對戰卡塔爾時敗陣，但鬍鬚曾認為港足已創下近年參與國際賽事嘅佳績，指香港廣大球迷絕對收貨。喺母校喇沙任劍擊隊教練逾30年嘅佢話，經常同學生講，面對對手若10場只能贏1場，應好好記住嗰一場勝利，然後盡力令勝利賽果重現。