昨日講及「錢途學科」，並非Global Business與醫科。讀醫科人人會講，做醫生可以一世搵銀無憂，頭十年要在公立醫院捱吓先，成為乜科物科專家後就有望出外掛牌成為「星球人」、「月球人」。不過上星期聽到一位大名醫講：「我個女都係醫生，在倫敦買樓借唔到錢，卒之係問我借，依家醫生搵錢唔易。」在倫敦更加不易啦，邊有香港咁好。
醫生C就話以前佢在公立醫院出到嚟就去養和做門診醫生，當年只有四人，踎咗幾年就辭職出嚟掛牌，辭職後有半年先至離開，還有半年派新卡片，帶走部份相熟病人做基本客戶，生意有基礎。但現在呢間超級醫院有好多門診醫生，難有熟客，兼且新制度之下，一辭職就要立即鬆人，不容許辭職醫生有派新卡片機會，出到去掛牌初期，會幾緊張㗎，要做月球人呀，有排捱。
讀環球商業，旨在入投資銀行，呢行已成為「投機性」，有幸做幾年冇金融不穩就可猛收花紅，但每周工作七十小時閒閒地，碰巧有大刁，可能連續三日通頂，捱到面無人色，投資W位千金在華爾街工作兩年，收足兩年頂級花紅之後，第三年間公司就被收購，然後「被提早退休」，返回香港，另一位世姪在投行工作，最近連續不停開工41小時，令阿媽心痛到極。
左丁山最近八卦，見到幾位世姪女在讀完國際學校，讀完長春藤名校，讀完MBA之後，入晒投行工作，點知結婚之後，三十歲出頭，唔係自己辭職就係被辭職，問吓佢地阿爸係乜原因，得到嘅解釋竟然相同：乖女想生育，做阿媽，做ibank連生育時間都冇，索性辭職回家等生，生後就湊仔湊女。做師奶？多年教育投資去晒邊？嘥啲喎，但無法子啦，大部分中國女性無論點樣接受美式教育，總以家庭為重，生兒育女係人生最大要務。財務M最近食飯時先至同我地講咗一個似乎係笑話嘅現實個案，佢嘅部門向一間投行請咗一位叻女返嚟，以為執到寶，點知三個月後，叻女宣佈懷孕，好快就要申請前四後六假期，財務M要搵人替代，又俾佢從一間會計師行搵咗一位女經理，做得好唔錯，但六個月後，女經理又宣佈懷孕，等叻女上班銷假之後，就輪到佢前四後六，財務M開始假設兩位叻女係夾定輪流去生BB嘅，我地笑佢：點解唔請男士？財務M大嘆：「依家啲男仔面試時，硬係差少少，唔夠女仔醒！」