拒被物業綁住青春
黃先生：我從來都唔會諗買樓，供樓好嘥時間，寧願攞啲錢做其他嘢，又或者用20、30萬就買到日製二手船。我覺得買樓好傻豬，幾百萬先買得嗰幾百呎嘅單位，跟住你就供20、30年，俾層樓咁樣綁住。
汪敦敬：年輕人生活應該交由他們自己決定。不過由實際財務安排角度出發，無公屋亦都無父蔭嘅年輕人，要認真諗租金問題，例如考慮租金與供款開支相若嘅情況下點處理。
林浩文：買樓唔係人生嘅唯一一個目標。理想可以是各種各樣，唔一定要將樓擺響首位。
關焯照：對香港人嚟講，樓某程度屬於必需品，能力許可下應該趁早置業，而且退休後亦可作逆按揭安老，不過實力唔夠就唔好勉強上車。
期望爆煲執平貨
陳先生：唔驚樓市跌喇，自己都無物業，梗係跌得越多越好喇，最好就跌九成。如果用實際因素考慮，我就估唔到嚟緊樓價會點。
汪敦敬：我覺得唔實際囉！就算樓價跌九成，啲人都仲想跌，嗰時經濟亦都出現大問題。睇返2003年樓價谷底，當時經濟是最差的時期，失業亦最嚴重。
林浩文：無話樓價跌幾多成大家一定會好，更重要係負擔比率嘅高低。好似話樓價跌五成，大家人工無咗一半，到時負擔比率一樣。
關焯照：樓價跌九成有一個機會，就係有重大政治改變！不過，樓價跌九成的代價好大，好多人財富蒸發，到時啲人唔係排隊買樓，而係排隊攞粥水、等救濟。
業主料樓價難大跌
梁先生：我諗樓價跌多一成左右見底，因為建築有一定成本，而且今次樓市下滑同1997年情況唔同。當年講緊揸幾層樓，今次大部份都係揸1層至2層，估計嚟緊跌多一成自然應該都有人入市，因為累積好耐無人買樓。
汪敦敬：用家唔適宜去搵最低個價，但可以租金回報率去分析樓價未來趨勢。
林浩文：認同佢呀，當年97時10個煲都唔知有無5、6個蓋，但𠵱家政府都捉得好緊，貸款比率處於一個健康水平，暫時睇返香港經濟亦都唔係真係好差。
關焯照：樓價幾時見底呢啲個人判斷喇，但覺得佢幾理性，起碼睇到97至98年的重演都好難，因為暫時睇唔到金融制度出現問題，同業主持貨能力唔太差。
