唔使斷症同施藥，只要一個眼神，病患者就精神一振，香港竟然有神醫？係呀，就係一班考獲「執業」資格嘅動物醫生嘞，佢哋每逢假日會到唔同地方「應診」。今個復活節，兔醫生、貓醫生同狗醫生就一齊到咗葵盛東邨一間護老中心，賣萌𠱁老友記一笑。
兔醫生BB係獅子兔，兩頰長滿長毛，神態嬌憨又溫和，任由初次見面嘅老友記摸。主人黃曉華話4歲半嘅BB有4年「行醫」經驗，平時對佢呵護備至，「夏天喺籠入面鋪冰墊，等佢涼快啲；冬天會多添毛氈，以免佢冷親」。
狗醫生同貓醫生都好忙，不停同老友記「交流」，助佢哋忘卻煩憂。動物醫生創辦人陸茵玲話呀，同動物互動令人心情暢快，增加自信，而老友記同動物玩拋球遊戲，亦可活動四肢，達到物理治療效果。
只要寵物身體健康、性格溫馴，就可申請做動物醫生，之後要經獸醫考核同評估，通過三項嚴格測試，及格後要探訪實習，表現達標就可以正式註冊。詳情可參閱動物醫生網站 http://www.doctorpet.org.hk/index.php?option=com_frontpage& ;Itemid=1