大年初一旺角騷亂，本土民主前線成員幾乎全數被捕，年僅17歲的小妮子臨時擔大旗做發言人，處理組織事務、對外回應一腳踢，讓公眾認識衛碧君這名字。但對她來說，當時更面對中學文憑試這人生挑戰，不曾擔心影響學業、前途？她像說別人故事般冷靜：「我唔係好在乎結果，你嘅價值如果只係畀一張Cert（證書）表達出嚟，你嘅價值係十分低，係好可悲嘅事。」
農曆年假期是文憑試考生埋首苦讀的時光，衛碧君卻忙於為騷亂善後。她坦言溫習進度「Delay（延後）咗少少」，但權衡學業與社運，她選擇後者，「有啲關乎組織利益，呢個時候我會擺低自己嘢，因為我唔只同自己交代」。
為趕回進度，衝刺階段策略不能一成不變，例如直接做練習，而非先慢慢溫習。各科投放時間亦要取捨，「地理同經濟寫到Point（要點）就有分，呢啲比較有把握嘅會溫先」。她指中、英文「谷唔到」，「唯一做到係背多啲金句，等作文同Oral（會話）有例子用」。本身讀東區名校嘉諾撒書院的她，期望DSE成績可以入讀浸大傳理學院的公關及廣告，一旦失手她亦早已報讀副學士及專業教育學院（IVE）等後路。對於哪科是弱點？她說：「中文一定係死亡之科」，她認為學生沒有成年人的人生及世界觀作答題目。
入大學非人生唯一目標
談起人生第一場公開試，她出乎意料地表現輕鬆，「除咗實力更加多講運氣，譬如考Oral（會話）會唔會遇到好勁或者好豬嘅隊友，Listening（聆聽）試場又有無人裝修」，其說法比輔導員，看得更開，「唔係讀唔到大學就要放棄自己，人生就玩完」。
升中後加入辯論隊，讓她討論社會公認的價值觀，反思人生。她不認為入大學是人生唯一目標，對於學生輕生，她的解讀是年輕人「被編排」得太多，「大學之後，唔知自己下一步做乜，會好迷茫」。
若失落大學學位，她坦承心底會「少少唔舒服」，但她想深一層，走不一樣的路又何妨？「呢一兩年我實在太唔一樣……望返都未去到大家講咁絕望」。參與社運會影響學業、前途這類口頭壓力，她聽得太多。她反因自己與大多數人不同而自傲，「幾百年前女人都紮腳，到今日紮腳先係迂腐，話唔定日後我哋先係傑出或者帶領潮流嘅人」。
■記者蕭洛汶