復活節最後一日假期去邊好？不如睇場好波啦！今日三點喺旺角場會上演菁英盃四強，由東方同南華呢兩支傳統勁旅爭入決賽。
東方早前喺聯賽盃四強出人意表地以1:6大敗畀傑志，教練陳婉婷（牛丸）希望藉今仗攞番信心：「嗰場波毫無疑問係個打擊，但球隊勝在多有經驗嘅球員，亦好期待呢場波，喺所有人面前證明番實力。」球隊有五位球員啱啱喺上周四隨港足作客卡塔爾，牛丸坦言有啲影響，要視乎各球員嘅體能狀況決定陣容。門將葉鴻輝為港出戰時撞傷，未知今場踢唔踢到；聶凌峰同羅拔圖就要停賽，基頓亦都唔踢得，數數吓後防出到嘅人真係唔多，牛丸話防中同中堅可能會用謝敏榮同曾至孝，好彩早前受傷嘅防中迪高，今場有機會可以復出。
南華恨報仇 東方博反底
南華上場喺聯賽盃四強以互射12碼淘汰標準流浪打入決賽，今日挑戰殺入第二項決賽。取代米路擔正為南華教練冇耐嘅列卡度上場賽後話，希望贏波可提升士氣。不過其實只計90分鐘內戰果，南華已經七場不勝。球隊今季兩次對東方，分別喺銀牌四強互射12碼被淘汰，再喺聯賽以1:3輸波，往績處下風，今日梗係想報仇啦！估計日前又添丁嘅隊長陳偉豪會繼續退居後備，但陳肇麒應該踢得，中場卡路士亦已重投操練。