信和集團執行董事黃永光同新地執行董事郭基煇呢兩位富二三代，早前同遊新加坡，唔通有項目要兩大集團一齊發展？咁諗就錯嘞，查實佢哋係響應香港青年聯會嘅新加坡考察活動。
聯會之前都組團外遊，2014到倫敦、2015年去南韓，今年則去新加坡，有廿幾人參加，考察主題係當地嘅房屋政策，23號出發、25號返港，其間拜訪當地嘅市區重建局、建屋發展局，又參觀活化建築以及新加坡國立大學startups ecosystem（似乎佢哋對特區政府嘅「去國立化」冇有怕喎）。
據聞范太囝囝范駿華係團長，副團長係高鋒集團主席吳傑莊，郭基煇同黃永光都係執行團長。唔知佢哋此行有乜收穫？會唔會向梁班子分享考察心得？八方問過吳傑莊，佢話香港同新加坡相比，營商環境更寬鬆，利於工商界自由發展。