八方之前都寫過，有「左王」之稱嘅中央政策組首席顧問邵善波北上出席兩會時，發炮狂轟建制派議員溝通不足兼失職，毫不客氣咁批評「40幾個人（建制派）各自搞搞震」，辣㷫建制陣營，仲私下叫佢做「躁狂波」。港台節目《城市論壇》噚日傾到「躁狂波」抦建制派一事，台上幾大政黨阿頭都趁機還拖，工聯會黃國健甚至諷刺對方當時係咪飲醉酒high過頭？希望對方出嚟交代喎。
自由黨主席鍾國斌同民建聯主席李慧琼先後發言轟邵善波。鍾反駁若40幾個建制議員同一理念就叫「建制黨」，「咁我哋就可以全部收晒聲，佢自己一個發聲算數」；佢節目後再轟邵嘅言論不負責任，侮辱建制議員智慧，皆因政府有時自製炸彈，甚至放喺建制議員手中引爆，先令議員同政府「鋪鋪清」。
李慧琼話邵善波可能眼見政府施政困難先有感而發，但強調建制派唔係鐵板一塊，並非所有議題都持同一立場，總之唔係一個政黨。
鍾國斌叫琼子選特首
當中最火要數黃國健，佢話對邵善波嘅言論感到好奇怪，講到明對方要澄清，係咪飲醉酒「high過頭、自high」而出此言？強調明白對方「護主心切」，但言論必須公道喎。中央政策組回覆傳媒查詢時，話邵善波唔喺香港，未能回覆喎。
民主黨莊榮輝台下發言時則趁機質問3人支唔支持梁振英連任特首，鍾重申若梁沿用現時施政手法，當然唔支持，仲即席鼓勵李慧琼去馬，仲搞爛gag話之前民建聯葉國謙稱該黨卧虎藏龍，李屬虎，所以「卧虎就喺我隔籬」。
李八方
mailto:[email protected]