英格蘭前晚作客柏林同世界盃冠軍德國踢友賽，靠李斯特城同熱刺球員包辦三個入球，包括神射手榜頭兩位嘅哈利卡尼同占美華迪各入一粒，落後0:2下戲劇性反勝3:2。英國傳媒即時煲到大一大，唔知真係以為英軍好似1966年贏咗世盃咁，但德國踢友賽成日揸流攤，近六場就輸咗四場，所以我求大俠唔明英國佬咁開心做乜。
卡尼華Dee孖住入靚波
德國上周六喺柏林奧運球場約戰英格蘭，踢咗一粒鐘唔夠就憑卻奧斯同馬里奧高美斯各入一粒領先2:0，但最後半粒鐘先係戲肉。英格蘭先喺61分鐘由𠵱家喺英超射手榜以21球排首位嘅熱刺前鋒卡尼，禁區內solo射破紐亞十指關而追成1:2；75分鐘，後備入替嘅李城射手華Dee禁區內接應尼達利基尼右路底線妙傳後腳射入追成2:2。當球迷以為和氣收場時，艾歷迪亞喺補時一分鐘接應佐敦軒達臣開出角球頂入，最終英格蘭戲劇性反勝3:2，仲爆出35倍波膽。英軍雖然贏波，但門將畢蘭特完半場前因整親腳傷出，要用擔架抬離場，情況都幾嚴重。
德國踢友賽明揸流攤
周二將會喺主場友賽荷蘭嘅英格蘭，喺德國主場落後兩球下反勝，英國傳媒即時捧到佢哋上天，特別係迪利阿里、迪亞同卡尼呢班90後，仲話隊波經已唔再需要養緊傷嘅老臣子朗尼；主帥鶴臣更加話前晚喺柏林嘅勝利，係佢上任以嚟最正嘅一晚，又話旗下班幼獅無懼世上任何一支強隊。我求大俠認同英格蘭班新人真係幾得，但冇必要將一場友賽放到咁大囉，唔知真係以為佢哋贏咗世盃。德國踢友賽出名流，連埋呢場近六場得一勝一和四負，包括主場反輸畀美國1:2同逼和澳洲2:2，英格蘭贏到佢哋唔代表啲乜，若然歐國盃決賽周分組賽或者16強出局咪盞樣衰。
小豬六月娶伊娃
因膝傷退隊嘅德國中場舒韋恩史迪加，據報已定好同網球靚女伊娃諾域嘅婚期，婚禮會於6月5日喺伊娃家鄉貝爾格萊德舉行。若小豬趕及傷癒，結完婚就要趕去法國，因為歐國盃6月10日就揭幕啦！
