鄉事派籌組新黨以便派人喺9月立法會選舉出戰，組黨主將包括上水鄉事委員會主席侯志強。港台節目《城市論壇》噚日亦以鄉事派組織為主題，請嚟民建聯主席李慧琼、自由黨主席鍾國斌、工聯會副會長黃國健同侯志強辯論一番。點知主持蘇敬恆喺節目開始前5分鐘，仲未搵到侯志強；過咗一陣，先被通知對方因病未能出席。
咁啱突然有病，有花生友質疑係咪因病縮沙？八方問過侯志強，接通電話已經聽到佢把聲沙晒，但唔係傷風或感冒，侯志強強調自己冇病，只係前晚搞咗個歌唱晚會，過去兩周又忙住搞洪聖爺誕，「招呼萬幾二萬人」，結果噚日朝起身聲都沙埋，講唔到嘢，強調一早就叫助理透過WhatsApp通知港台要缺席，唔知主持點解節目開始前都唔知喎。