呢幾日晨操冷冷清清，皆因唔少騎練都去咗杜拜，亦有騎師趁復活節假期小休一兩日，但兩位練馬師胡森同孫達志就經常喺朝早密密傾，佢哋今季一定要贏夠15 場，下季先有得留低再玩。胡森最近開始發力，有「紅褲精神」同「開心旅程」贏馬，頭馬數字升至7場，但當然距離達標，仲有漫漫長路。
胡森養馬數目只得18匹，未來三個半月內要贏八場，打逆境波真係鬥智鬥力，佢話一處理完馬房工作，就會操Fit自己，方法好簡單，就係善用沙田單車徑！
胡森說：「我會由沙田馬場經吐露港，去到大尾督，再踩返沙田。」呢條熱門路線，相信好多馬迷都試過，胡森話每個星期都踩，感覺成個人精神咗，希望啲馬亦一樣精神，繼續反彈。
胡廄有項數據好特別，莫雅同莫雷拉兩大高手，從來都贏唔到胡廄馬，反而與蔡明紹同蘇狄雄兩位華將就好夾，好似今期(28日)頭場隻「高山威龍」，前仗由莫雅出擊搏失只跑第五，上場換番蔡明紹幾乎贏馬，只係輸畀突如其來嘅大冷門「八運」屈居亞軍。
今次「高山威龍」繼續由蔡明紹壓陣，人馬曾喺季初同程泥地1200米跑第二，當時仲喺四班，而且跑第一係其後再勝嘅惡馬「現代財星」，計數「高山威龍」家陣喺五班，真係好有份量，練者話希望可以勝出，為馬房護級戰打下一支強心針。