最近有班運動員嘅舞台由運動場變成錄影廠，佢哋嘅另一面就現形嘞！
黃曉盈唔識睇中文，冇問題，聽講葉蒨文同薛凱琪都係用自己嘅方法拼音，Angel於是照辦煮碗，不過效果有啲唔同，可能係因為佢記憶力太似金魚，好在每次腦袋一片空白時，Angel都有招絕招，就係做一字馬，我懷疑佢第日可能會創出做主持嘅新風格，就係唔使講咁多，淨係做動作。
余翠怡把口叻好多人都知， 以往聽佢講運動嘢多，但原來佢亂噏能力仲強，唔好睇少呢樣特異功能，喺直播dead air時就大派用場，翠怡作為執生王，呢項神功並唔係話做幾年電台就有。
至於足球串燒三兄弟，好明顯係靠足球上位，三個中Dragon黃耀富以浮誇造型加動態，肯定最早彈出，講嘢係搞笑嘅，但口脗來來去去唔係星爺feel就係敏驄look，最嚇得人嘅K-POP舞步就次次都係嗰幾步，奉勸Dragon一句，天才波唔可以踢一世，來一次首爾觀摩團吧。
啱啱做咗第二任爸爸嘅Captain豪，可能膊頭擔子較大，平時係以cool look行走江湖，不過其實Captain豪表演欲超強，但始終做開老竇同大佬包袱係重嘅，製作團隊諗緊點樣可以令佢放鬆兼放膽，建議方法可能係開廠前飲番兩杯先。門神謝德謙嚟講呢，可以話係夾喺兩位兄弟中間，高度佢拍得住Captain，笑點佢唔低得過Dragon，加上擺pose嘅能力冠絕球壇，謝德謙係有行偶像派嘅能力。
不過咁多位運動員中最識搞氣氛嘅，肯定係花式王施寶盛，皆因佢一早已經喺街頭摸熟咗觀眾咩like咩dislike，波固然唔離腳，最近仲開始暗推愛犬薯仔，不過佢可能估唔到，狗仔未表演花式已經搶鏡過主人。之後其他運動主持會陸續出場，香港運動員嘅一場口水大戰，即將水花四濺。
KEYMAN
節目主持