碧咸最近忙於搞佢隊新美職聯球隊，希望呢支邁阿密聯隊趕得切喺2017年球季加入。日前有報道話，佢已經買咗地揀好新球場地址；至於隊波有乜球員暫時未有眉目，但教練人選已經有心水，就係碧咸昔日效力皇家馬德里嘅隊友、前巴西國家隊後衞卡路士。想當日一個卡路士一個碧咸，一個左腳一個右腳射罰球都咁犀利；而卡路士退休之後，亦曾經喺俄超同印度教過波。