年僅18歲嘅香港乒壇新星何鈞傑真犀利，繼本月中喺科威特公開賽連取兩銀，包括U21男單亞軍同公開組男雙亞軍後，上周五晚更上一層樓，喺多哈舉行嘅卡塔爾公開賽U21男單賽，佢喺決賽以3:2擊敗法國球手羅賓諾（Alexandre Robinot），攞到男單冠軍，鈞傑喺舊年一月贏過匈牙利U21冠軍，不過級數唔及今次超級賽咁勁。成人組方面，男單黃鎮廷順利打入八強，女單帖雅娜次圈就以4:3勝日本名將福原愛入八強。