【旅遊籽：文化地標】
「諷撞工氣鞭」，聽得懂嗎？這句說得有點歪斜的廣東話，其實是蜑家話，俗稱水上話，意即「放咗工去邊」。蜑家話是廣東話的分支，跟廣東話發音相近，英文Hong Kong的發音，都是來自蜑家話的「糠港」。自稱「水二代」、33歲的黃敬業（Issac），爺爺及父親都是水上人，以曬家艇營生，即專門曬乾魚穫出售，於八十年代上岸。耳濡目染下，Issac自幼便懂得說水上話，「其實以前一代人唔覺自己喺度講其他語言，我要去到小學，跟同學傾偈嗰陣，先發覺大家嘅語言有差別。」
釣魚＝呔椅
Issac自小住在筲箕灣，早幾年更自資創辦社區報《紙筲箕》，記錄細節風貌，「之前做過統計，筲箕灣只有唔夠200艘漁船，舊年火災再把廿多戶艇家趕上岸，現時跟全盛時期相比，漁船數量只剩三分一。」大批水上人離巢，加速經濟轉型，根深柢固的漁村文化、社區語言亦受動搖。蜑家話不但有獨特發音及詞彙，「例如水樽讀『水真』，受傷讀『受桑』，釣魚讀『呔椅』。」更因水上人長居艇上，而衍生出很多與船隻及漁業有關的字詞，陸上人多數聞所未聞，「例如『大撈便』、『細撈便』，分別指船嘅左邊同右邊走廊；船側就統稱為『格勒頸』；漁民常用嘅發泡膠箱，就叫『膠cog』。」表達方面亦有差異，「唔係講去飲，係話去飲燒酒。」看似粗獷，有些字眼卻較文雅，好像一塊布會稱為一簾布。
踏入網絡時代，原來漁民都有facebook群組「香港漁民- 我們都是水上人家」，黃敬業的爸爸正是管理人，「呢個群組好勁，聚集咗好多水上人，佢哋會用文字記錄水上話嘅用法，保存咗好多珍貴嘅資料。」不過語言始終跟生活環境共生，上了岸，水上話自然消亡，Issac指：「𠵱家我都冇辦法好自然咁講水上話，個氛圍唔啱，講唔到，之後一定會慢慢式微，冇辦法。就算漁業復蘇，成套語言都冇辦法重生，好可惜。」
水上人生活在風浪之間，望天打卦靠海吃飯，加上舊日較少接受教育，相對迷信一點。Issac自言家中有很多禁忌及不成文規矩，例如吃飯前擺放飯菜，不可像拜神般一字排開，要圍成一圈；嬰兒不可食頭飯（即整鍋飯的第一勺飯），否則會好狠惡。反而經常聽到的吃魚不要反肚，Issac卻說沒此習慣，「我屋企冇吖，照樣用筷子反魚。」看來各處漁村都有各處例。
記者：臧諾
攝影：伍慶泉
編輯：陳國棟
美術：吳子豪