講開長毛60大壽，梗係唔可以唔記得一班同佢政見不同，但又惺惺相惜嘅政界友好，當中點少得同佢一齊去旅行嘅立法會主席曾鈺成，同埋曾俾長毛請食蕉嘅自由黨榮譽主席田少，佢哋兩個竟不約而同勸長毛戒煙。
曾主席、田少，同埋唔少政界名人，噚日都有拍片為長毛賀壽，曾主席喺片中同長毛講，話食煙、拉布、勞氣都係傷身嘅，戒晒佢咁話！田少就話，好多朋友話長毛外形殘過佢，所以田少勸長毛拉布可以照拉，掟嘢可以照掟，但食煙真係要戒咗佢；又話當年同長毛選新界東立法會被長毛質問佢知唔知一隻蕉幾錢，佢估咗一蚊隻後，就俾長毛寸佢不知民間疾苦，因為蕉唔係一隻隻，而係一梳梳咁賣，笑言當時真係俾長毛考起。