噚日係復活節假期首日，但好多打工仔都同八方呻冇假放，皆因現行法例只保障員工每年最少有12日假，復活節就唔包括在內，唔似得白領一族每年有17日公眾假。
職工盟十多名代表，噚日由金鐘港鐵站遊行至政府總部，手持寫上「Give me five」嘅巨型手掌紙牌（圖），力爭將勞工假增加多五日，令全港所有僱員每年同樣享有17天有薪假期。總幹事蒙兆達話，全港有成80萬名打工仔每年放少5日假，佢哋多數係基層勞工，工時較長，早前同僱主聯合會行政總裁龐維仁會面，對方都唔反對逐步增加勞工假日數，希望特首唔好再拖延處理喇。