旅遊T在地鐵車廂親眼目睹年輕女子對別人惡言相向，用粗口破口大罵另一位中年女士，慨然嘆息「世風日下」。以佢之人生經歷，只聽過歡場女子講粗口，而且都係私底下講嘅，未見有女子公然在地鐵車廂內大大聲把男女性器官掛在口邊也。
旅遊T問左丁山講過粗口未，當然講過啦，香港男人冇邊個敢膽話自己未講過粗口，左丁山唔會係，但自己講粗口有個戒條，只在相熟男士飲酒互相取笑之時候講，絕不在有女士出現嘅場合講，免有失斯文。左丁山一代讀中小學時，老師絕對禁止講粗口，講甚麼「寸呀，還拖呀，晒馬呀」，都會俾老師禁止，指係黑社會低等俗語。老師不在，咁又如何？我地成班男仔曾猛講粗口，以示成熟，點知班上有幾位女同學好硬淨，每聽見我地講，就會高聲嗌mind your language（我地讀英文中學），或者係behave yourself，話得多，班男同學果然收斂晒。左丁山座位啱啱喺兩位「惡女」之前，女同學L周時在後面用鉛筆或間尺篤左丁山背脊，警戒唔好講粗口，於是自此養成習慣，絕不在女士面前講廣東三字經。
多年後，女同學L成為名媛，不時在娛樂周刊見到佢嘅照片，佢老公曾是大馬主，有時在馬場碰頭，左丁山都要多謝佢當年「篤背脊」，令到左丁山斯文咗，勢估唔到，今天竟然有女子講粗口，旅遊T話：「粗到成個地鐵車廂啲男人唔敢出聲。」於是大家討論吓，如果當時有男士唔抵得，用粗口回贈該女子，會有甚麼後果？如果最後鬧上警局，該女子夠膽話俾男士「眼睛強姦、語言非禮」，那麼男士怎麼辯護？須知道，年輕女子大嗌一聲非禮，性騷擾，男士就麻煩到極嘅噃，又假如車廂其他人怕事，或怕麻煩，唔肯出庭作證，咁法官會信邊個？
旅遊T話：「我就係諗到呢一點，於是閉口不言，幾慚愧。」旅遊T仲有一怕，如有花生友在場暗中舉起手機拍攝，跟住放上網，自己入了鏡頭，咪又係好尷尬！正是好佬怕爛佬，爛佬怕潑婦，大家齊齊怕被「上網」在fb廣傳，有咁多因素，現在社會行為，男女關係不再一樣了，左丁山呢類人可能已經係堅離地，在中環太久，不知旺角深水埗世界了。