挾杜琪𥧌任監製的光環，再獲柏林影展加持，由三位新晉導演許學文、黃偉傑及歐文傑主理的電影《樹大招風》成為本屆香港國際電影節開幕電影，賣的當然不是強大後台這麼簡單，還有電影的真材實料。故事借回歸前三位被指為香港賊王的人物作藍本，任賢齊、陳小春及林家棟各自表述自大狂妄、霸氣逼人、陰沉可怖的賊王性格，最終卻走上絕路，結合97命題，寓意呼之欲出。不過電影背後卻看到影圈的希望，港產片的味道再次湧回來的興奮！撰文﹕曹家誠
三位賊王的事迹相信無人不曉，導演和編劇着墨在三人計劃合作做驚世大案前的經歷，表面上個個都是叱咤風雲，獨當一面，實情是各自面對生活、慾望的無奈和諷刺。從小齊戲中名字叫葉國歡、小春的卓子強和家棟的季正雄，都不難估到角色的人物誰屬，在事前準備上家棟就曾問導演：「我問導演編劇角色係咪同真實相似？佢哋答我係原創。於是就只係有參考部份，而且每人只得三十分鐘，攞太多資料反而會影響原創，倒不如相信編劇跟佢個方向處理角色。」小齊補充：「導演有講呢套唔係紀錄片，所以我冇用太多時間去了解佢哋，主要就導演要求去發展。」
向新導演派定心丸
《樹》片由三位新晉導演主理，而事實上除林家棟外，任賢齊和陳小春都少有跟新導演合作，家棟說：「今次係杜Sir第一次支持新導演拍長片，𠵱家影圈係需要新血，我哋有時都會有盲點，需要新嘅導演去提番我哋。」他更直言拍攝時導演背負巨大壓力：「我不嬲都冇俾人叫阿哥嘅，導演叫我做棟哥，平時杜Sir唔係咁叫我㗎嘛。」在旁的小春附和說：「佢叫我春爺呀。」至於小齊？他尷尬笑說：「任總呀！」小春又說：「好在成個故事佢哋搞咗足足七年，已經同杜Sir磨到熟晒，知道發生乜嘢事，聽佢講改句對白都要一年時間。」
眾人稱有杜Sir和游乃海在幕後監製，令故事和影像上會更完整及緊湊，小齊更稱：「我有同導演講你哋有老師喺度睇住，咁難得嘅機會，又多大牌演員畀你用，所以放心拍。」
三個大賊各自修行，到末段才交代他們一同現身「風滿樓」，同時亦是首次碰面，小春說：「嗰場講我哋喺同一地點擦身而過，但係就冇任何對手戲。」雖然三人在戲內始終緣慳一面，但在鏡頭後互相對大家的造型有一番說法，自言打扮最正常的小齊說：「我最後一場先見家棟，佢當時企喺酒樓門口食煙，着得好娘又夾住個袋，仲以為係酒樓部長幫我帶位。至於小春，我第一眼淨係見到佢套衫，我仲問套衫咁閃，紅卜卜咁，小春啱啱做完騷過嚟呀，後尾先知係戲服。」
家棟鍾意市井角色
雖然取笑小春的戲服，但如果有得重新選角，小齊居然想演小春的角色：「有得食雪茄着靚衫，揸靚車，唔似得𠵱家個角色要走私偷渡，仲可以咁狂妄去人哋屋企唱卡拉OK。」小春則表明想同小齊對調：「揸住支AK-47幾有型呀，我諗我都handle到skin head、留晒鬚、兇兇狠狠呢種造型，𠵱家個角色成日都要求要natural high會好攰。」家棟的角色冇人揀，他也不忙自嘲：「我呢個角色梗係冇人揀，日光日白揸住兩個旅行袋喺九龍城行嚟行去，你估好過癮？成個鄉下佬咁，但我鍾意，俾我揀多次我都會繼續，我鍾意佢夠市井，又可以兇人，幾得意。」
化妝：Kitson Yu（任賢齊）、Issac Poon@Jack Timeless（林家棟）、Andy [email protected]（陳小春）
髮型：Seiko Sin@Hair Culture（任賢齊）、Alex Chan@Projetz4/Jack Timeless（林家棟）、Cliff Lam@Beijing（陳小春）
服裝提供：Armani Jeans（任賢齊）、Club Monaco（林家棟）、[email protected]（陳小春）
場地提供：九龍灣展貿EMAX
