【ViuTV開台】下月6日開台的ViuTV為開台劇《瑪嘉烈與大衛》找來街頭歌手、現年32歲的黃劍文唱主題曲，他面上帶着滄桑但經常笑容滿面。原來滄桑來自經歷母親燒炭自殺，自已亦有過步她後塵的衝動，笑容是因為重新找到生存勇氣，走遍17個國家在街頭唱歌的黃劍文說：「我好開心嗰刻冇跳落樓！」他用事實證明人總會有出路。
「活下去生命有改變」
黃劍文曾經參加過台灣《超級偶像》比賽，之後返港參加第一屆《超級巨聲》，同屆有許廷鏗，最後入到30強。他笑言為《瑪嘉烈》唱主題曲的經過恍如拍戲，他說：「有日喺中環街頭唱寫畀媽咪嘅作品《遠走》，有女士買咗我隻CD，之後打嚟話有主題曲合作，連今屆香港電影金像獎都邀請我表演。」目前他選擇留港發展三年，不成功再試到其他地方繼續唱歌。
黃劍文指母親15歲生下他，後來改嫁，跟後父經常出入麻雀館，輸錢後兩夫妻就大吵大鬧。在黃劍文26歲生日後第五日，母親燒炭死了，那一刻黃劍文覺得好孤單有跳樓的衝動，最後信仰跟理智令他清醒。當年臨崖勒馬的黃劍文，看到最近很多年輕人自殺新聞，很大感觸：「呢個世界好大，當你勇敢活下去，生命真係好大改變，我嘅改變就係去咗澳洲working holiday，不斷唱歌分享音樂，四年裏面去咗17個國家、30幾個城市做街頭表演，活喺自己夢想裏面，每個人嚟到呢個世界，一定有佢嘅意思，唔好因為挫折唔珍惜生命，唔好令愛我哋嘅人難過。如果將來我有仔女，我唔會賭錢，我會用最多時間陪佢哋，盡量愛同關心佢哋。」
撰文：余燕儀
場地：day off cafe