周四NBA常規賽，雷霆憑杜蘭特（Kevin Durant）攻入20分，主場以113:91擊敗爵士；而呢位球星賽前熱身着嘅超高筒KD 8 Elite波鞋，就惹嚟唔少球迷批評，甚至俾人戲稱為「短腳者噩夢」！
「腳短者噩夢」高到及膝
現今科技越來越先進，各大運動品牌都會不斷改善波鞋嘅設計，從而保護運動員，令佢哋降低受傷機會。杜蘭特最新嘅KD 8 Elite，賣點就係鞋內配備壓力襪，令球員可以表現得更好。不過報稱六呎九吋高，實際應該高多兩吋嘅杜蘭特，周四熱身着起呢對鞋嘅時候，襪筒竟然高到上膝頭；假如未夠六呎嘅人着起呢對鞋，襪筒隨時高到上大脾，真係「腳短者噩夢」！
杜蘭特對腳又長又瘦，佢着起呢對超高筒嘅橙色鞋之後，唔少網民都即刻改圖惡搞，話似卡通《芝麻街》Big Bird對腳，甚至有人話佢似着靴嘅《美少女戰士》㖭；其實KD嘅代言鞋款一直都係以低筒為主，唔知佢係咪因為試過比賽期間甩鞋，所以今次先會突然轉着高筒。
不過杜蘭特喺同爵士交手之前，唔知係咪覺得呢對超高筒波鞋唔好着，於是就換咗第二對鞋上陣。而佢今場攻入20分，幫雷霆擊敗爵士，取得六連勝之後表示：「我哋今場嘅表現唔錯，球隊透過不斷傳波撕破爵士嘅防守，所有人起手嗰陣都充滿自信。」而今場射入15分嘅韋斯卜克（Russell Westbrook）就大讚KD：「今場爵士派兩、三個人包夾佢，但佢都可以輕鬆得分，或者交出助攻。」
