前星期港鐵宣佈業績，叫做不過不失，大編輯心水清，睇完通告就對左丁山講：「港鐵嘅日常營運可能已達飽和狀態，如地產市道不振，港鐵要賺大錢都幾難。2015年有港島西綫啟用，但地鐵乘客，以人次計，增長唔夠兩個巴仙，以後如無新路綫落成啟用，好可能基本核心業務（即客運）變成零增長，全靠商場收租及出售樓宇利潤分成，同地產股差不多，仲要保𧙗高鐵與沙中綫唔好再有延誤噃！」
講得有道理。港鐵公司屬下之地鐵、東鐵、西鐵、輕鐵相信已用到100%流量，班次已極之頻密，路軌用到盡晒咯（一日8000班車，每分鐘有60班車到站），班班車都滿座，上下班繁忙時間直情係超載㖭，邊度仲有增長空間吖。朋友旅遊T在上星期一去旺角辦事，辦完就坐番地鐵返中環與老友吃飯，中午十二點幾，車廂唔算太擠迫，但都係滿晒，旅遊T入到嘅車廂有兩個「優先座」，一位阿婆拖住兩個大旅行袋坐咗一個位，佢隔籬就係一位妙齡女子A，旅遊T諗應該似係20零歲，女子A有一位朋友女子B，貌似30歲左近，不停向女子A講嘢，似係上級咁款。女子B甚為豪放，叫女子A睇相，直情彎腰俯身，屁股向右抬起，幾乎hit中旅遊T要害，嚇到佢向後急移（好彩冇撞到人），否則容乜易「被叫非禮」呀！一位普通阿嬸裝扮中年女士突然起火，喝一聲，指住女子A：「你坐喺優先座唔讓位呀？」女子A比較純情樣，立即企起身，點知女子B認真惡死，大喝一聲，震驚車廂：「×你老母，你咁冇禮貌喝人？」中年女士不妨有此一着，只能夠講：「咁冇家教㗎！」女子B聞言更發狼厲，乜嘢粗口都出齊，旅遊T萬萬料不到，個樣唔錯，化妝甚濃嘅女士竟然會在大庭廣眾講粗口鬧另外一位女士，為之震驚，但又唔敢搭句口，因為實會俾女子B用粗口鬧番轉頭，到時自己發火講粗口嘅話，容乜易鬧上警局，俾位潑女衝埋嚟，發生肢體接觸，跟住嗌非禮㗎，到時自己咪周身蟻！其實成個車廂有二三十人，冇個有幫口，中年女士到咗佐敦急急落車，女子B猶自大罵：「×你老母，死八婆。」旅遊T同我地講：「成日講世風日下，今日第一次見到活生生例子，乜依家啲年輕女子講粗口當食生菜？」唉，見識吓啦，或者係個別例子，但如果女子A（比較年輕純情樣）嘅家人知道，就要急急勸告佢要與女子B呢類損友拜拜咯。