近年越嚟越多豪門球會對歐聯賽制不滿，尤其係主賽圈擴張到有32支球隊參賽，當中夾雜唔少低水平球隊，搞到分薄晒佢哋啲利益。歐洲足協有見及此，據報正密謀喺今年將歐聯賽制作出重大變革，重點改變係將參賽球隊減一半至16隊。
16隊分兩組廝殺搶收視
喺歐洲足協主席柏天尼推動下，近年有越嚟越多嚟自二、三線聯賽嘅球隊，可以打入歐聯正賽階段；不過，有佢哋出場嘅比賽，就算係對住皇馬、巴塞呢啲豪門，吸引力都係好有限，收視低得可憐。
英國《衞報》透露，歐洲足協打算重整歐聯，將參賽球隊減到16隊；分組賽賽制亦會有大改變，16隊只會分成兩組，每組八隊各踢主客兩循環共14場比賽，再爭入淘汰賽爭逐冠軍。重質不重量，場場波都係硬嘢，到時電視轉播收費都可以叫高啲價喇；歐洲足協希望靠呢啲手段，可以令一眾豪門安份啲，唔好再密謀自組賽事嘞。據講呢個動議最快會喺今年九月通過，2018/19球季開始實行。