加拿大球手寶查喺周三邁阿密公開賽女單首圈輸波已經夠慘，更慘嘅係喺比賽期間唔小心露咗條打底褲出嚟，望落同香港歌手鄧紫棋（G.E.M.）日前嘅尿片look有幾分相似，真係嚇親球迷！
邁阿密賽首圈即out
寶查喺邁阿密公開賽女單首圈以盤數1:2不敵捷克球手夏拉迪卡，不過呢場波嘅重點唔係戰果，而係呢位22歲靚女嘅衣着！寶查今場陷入苦戰，已經顧唔到娘娘嘅形象，一心只想搏盡爭勝；喺某次發球嗰陣條裙被風吹起咗，露出大大條白色打底褲。
雖然呢啲事喺網球場上不時都會發生，不過啱啱有「時裝界災難」之稱嘅G.E.M.，以令人笑爆嘅尿片look出席強國QQ音樂盛典，望真啲同寶查條打底褲有幾分相似！話說廣大網民見到G.E.M.裝束後，即刻恥笑佢係識行識走嘅成人紙尿片，寶查今次不幸「撞褲」，就證明靚女都唔係大晒，難以令核突嘅造型變番正常。