特首千金梁齊昕去年3月首度披上婚紗，為亞洲婚禮攝影師協會主理的慈善項目，拍攝一輯婚紗相，掀起全城熱話，幕後班底正是3位著名婚禮攝影師Philip、Tony和Lewis，今次3位鮮有地同場披露當日婚攝細節，更對齊昕的表現有讚無彈，讓人看到齊昕在新聞外的一面。
「嗰陣齊昕都幾多負面消息，我哋都想透過啲相俾人見佢未被見過嘅一面」，該批婚照，除了拍攝出齊昕的性感一面，更突顯出齊昕的鮮明個性，Tony眼中，齊昕是一名天真的少女，而非新聞中硬朗冷酷的形象，「睇新聞覺得好cool，性格激少少，接觸佢真人嘅時候，只係一個小女孩，有好天真嘅一面，鏡頭後成日問『我影得好唔好睇，我邊part係最靚』，我自己覺得佢只係一個好普通嘅少女」。
3位攝影師都認為齊昕是爽朗又認真的少女，「佢係比較有個性，啲相亦展現出佢嘅個性出嚟，已經係成功」，Lewis形容齊昕是率真的女生，對於自己想做及喜歡做的事情態度認真，Tony舉例指齊昕的工作態度媲美專業模特兒，「平時搵model影相，影完大半日，覺得好攰，面色冇咁好睇，但嗰日影完，齊昕係好配合，佢係好enjoy件事，完全估唔到，對於未受過專業訓練嘅model唔係易事」。
齊昕除了被大讚有個性又專業外，更被Philip大讚「食材新鮮」，婚照無需「大執」，可以新鮮上碟，「佢係model骨格，我哋揀套套衫都carry到」，3位攝影師對齊昕的印象相當好，當時首度披上婚紗的齊昕亦表示感覺清新及好奇。
記者：梁佩珊