民協立法會議員馮檢基講過，積極考慮再戰新一屆立法會選舉，由於阿基區選敗陣，冇咗張超級區議會入場券，加上九龍西要交畀民協其他兄弟姊妹接棒，所以阿基早前透露，考慮緊喺新界西或九龍東落腳，有新西朋友同八方講，民協啱啱喺荃灣開咗個全新辦事處，阿基噚日亦喺荃灣港鐵站外呼籲市民登記做選民，睇嚟阿基已經搵到落腳點。
阿基同八方講，佢最終去邊度選，等民協決定。但被問到如果佢落新界西，會唔會擔心分薄工黨李卓人或者街工梁耀忠嘅票？皆因佢哋係走基層、勞工路線，但阿基嘅睇法有啲唔同。佢話，上屆立法會選舉，公民黨、民主黨一共三張名單，最終只攞到一席，浪費咗好多選票，所以即使佢真係落去新西，都唔會搶走工黨同街工啲票喎。