巴黎聖日耳門（PSG）靈魂人物伊巴謙莫域，同球會嘅合約到季尾就完結，雖然已經34歲，但老馬依然有火，仲大把人爭住要。盛傳佢下季將會投身英超，曼聯、車路士同阿仙奴都想簽佢；但「球壇呂布」最後情歸何處，可能要問過強國先。有報道指向來重視足球嘅中國國家主席習近平都睇中伊巴，誇張到開出7,500萬歐元（約6.5億港元）天價年薪，想帶佢嚟中超。
PSG今季成績超掂，四條戰線先喺法甲食出，提早好多鎖定冠軍，而喺法聯盃同法足盃就分別打入決賽同四強，歐聯亦已經躋身八強。伊巴謙莫域喺12/13球季加盟，年年都至少贏個法甲冠軍；如無意外，今季將會係佢連續四年成為陣中首席射手，到季尾約滿可以話係光榮離隊。據講唔少英超球會都唔嫌佢年紀大，想喺今夏免費簽佢，伊巴都透露過有興趣去英超闖吓，近日盛傳曼聯正積極準備斟佢；不過，伊巴始終都成34歲，曼聯只能夠提供一份一年合約，周薪亦唔會高過20萬鎊。
中央科水未定去邊隊
周薪20萬鎊，即係年薪大約1,300萬歐元（約1.13億港元），對一般球員嚟講無疑係非常吸引嘅人工；之但係強國一出手，呢筆錢就真係濕濕碎。意大利《共和報》日前報道，中國政府高度欣賞伊巴，希望將佢帶嚟中國球壇，睇好佢可以成為中超聯賽嘅icon，仲願意出埋錢促成轉會，開出嘅年薪條件誇張到成7,500萬歐元，仲勁過美斯喺巴塞隆拿3,200萬歐元年薪一倍有多。最抵死嘅係，份報道話有關方面仲未決定邀請伊巴加盟邊支中超球會，咁都得？
PSG出4.9億斟病壞史杜
伊巴勢必走人，PSG另一前鋒卡雲尼亦被傳會喺季後離隊，球會又要物色新鋒將補充火力。好揀唔揀，據講PSG睇中利物浦前鋒史杜列治，仲打算開價4,500萬鎊（約4.9億港元）收購。PSG亦派準人備前往倫敦，睇下星期英格蘭對荷蘭嘅友賽，吼實史杜列治嘅表現。不過，史杜近年喺紅軍傷多過踢，出呢個價錢買佢，都咪話風險唔大。