熊本熊有幾受歡迎就唔使多講，早排先嚟過香港嘅呢隻熊，早幾日再次喺香港出現，今次仲去咗劉德華嘅華仔天地探班。探班當日作為主人家嘅劉德華「囝囝」Andox同黑仔率先去迎接呢位嘉賓，3隻吉祥物難得聚頭，自然要合作跳番隻舞自娛。
聯名出T-shirt
而Andox同黑仔嘅「媽媽」華仔亦喺呢個時候出現，仲教咗呢位外賓跳咗隻《獨自去偷歡》，禮尚往來熊本熊亦都教華仔跳咗隻拿手嘅《熊本Surprise！》舞。到探班結束之後熊本熊送咗熊本縣著名特產畀華仔做見面禮，華仔就送親筆簽名年曆作回禮。
其實今次熊本熊嚟香港，主要係出席明日同後日喺一田舉行嘅熊本熊感謝祭，到時華仔兩位囝囝Andox同黑仔都會到場支持，仲會推出聯名T-shirt，所有收入扣除成本之後，將會全數撥捐「童夢慈善基金會」。
撰文：馮仁昭