出名數學叻叻豬嘅立法會主席曾鈺成，寫對聯亦有一手，噚日喺免費報紙《AM730》專欄講解「無情對」對聯係乜東東，仲以特首梁振英做咗個「驚世例子」！
曾主席話呀，一般對聯嘅上下聯，講嘅都係同一主題，或者相關事物，但無情對呢，上下聯就互無關係，仲要離得越遠越妙。佢隨後就露一手，示範「梁振英」呢個名可以點對喎。
佢解釋，「梁」係姓氏，亦係名詞，同地形有關，所以對「國」字就啱嘞。至於個「振」字係動詞，例如「振動」、「振臂」、「振興」，都有由靜起動含義，所以可以對動詞「安」啦！最後個「英」字呢，係國家名喎，可以對另一國名「法」，最後結論係：「梁振英」對「國安法」就「堪稱工整」！
嘩，外面不時質疑，梁振英若然連任會搞23條，曾主席呢一對「對（音︰隊）」，唔會無情情啩？可能擔心方丈好小器，曾主席最後戴番頭盔，強調無情對上下聯都互不相關，亦無任何寓意，今次只為「博讀者一笑」。八方睇完真係笑咗，估唔到，曾主席都咁識呃like喎！