永倫噚晚喺修頓室內場舉行嘅高級組銀牌籃球賽負方戰硬撼飛鷹，雖然喺第一節落後18:23，但最後以96:72反勝，下周二就會同贏晉龍嘅南青，爭入負方決賽。
可能因為負方賽事唔夠叫座力，就算有上季甲一季後賽總冠軍永倫打壓軸，修頓噚晚亦只係得七成左右嘅入座率。頭場由南青對晉龍，南青上場逼到職業球隊東方有氣冇碇唞，所以今場賽前都被睇高一線；而佢哋都冇令球迷失望，憑「得分王」蔡再懃獨取24分，以91:75擊敗晉龍。
對於下場會同永倫爭入負方決賽，蔡再懃話：「對永倫一場，我哋希望以平常心去打，先做好防守部署，再加進攻得心應手嘅話，希望贏到。希望我哋對永倫嗰陣，每一節都唔好被拋離10分。」
永倫泰那轟33分捕「鷹」
至於尾場永倫對飛鷹，永倫喺第一節先落後，不過勝在兵源夠，第二節尾聲憑主將泰那多次遠射得手，最後扭轉局勢贏96:72，而泰那就拎到全場最高嘅33分。