F1各支車隊每年都會諗盡辦法改善戰車表現，一眾車手每季都要用唔少時間適應。「黑帝」咸姆頓就可能揸唔慣新車，導致喺周日舉行嘅澳洲站揭幕戰失準；呢位31歲平治車手日前表示，新戰車W07比太空船更難操控：「如果其他人見到駕駛艙入面嘅情況，一定唔會知我做緊乜，因為有時我都唔知自己做緊乜！個軚盤有勁多掣，要準確控制架車真係好難。」