小C朗好快有個細佬或者妹妹同佢玩嘞！葡萄牙《晨郵報》日前爆料，話效力皇家馬德里嘅葡萄牙球星基斯坦奴朗拿度（C朗），舊年年底秘密飛去美國，搵代母再幫佢生B，而且搞掂晒啲手續。消息指，C朗嘅團隊經過嚴格挑選，先至搵到合適人選；聽聞C朗喺呢件事上使咗100萬歐元，條數仲未包畀代母嘅費用，雖然冇人知具體金額係幾多，不過幾百粒應該走唔甩囉。其實小C朗都係C朗搵代母生嘅，事後佢仲畀咗對方近1,000萬歐元，當係掩口費之餘，亦等對方唔會同佢爭撫養權。