皇仁書院大大話話超過150年歷史，歷年大把高官名人喺呢間名牌男校畢業，前警務處副處長馬維騄同前保安局局長黎慶寧就係其中兩個皇仁仔，佢哋噚日聯同中一與中六近百學弟參觀PMQ元創坊，即係皇仁書院前身嘅中央書院。兩位重量級校友都以身為皇仁仔為傲，懷緬校園點滴，馬Sir自爆讀書時係運動健將，時不時就去友校𥄫女，黎慶寧就係文人，唔追女仔，上堂寄情周公，但試過打籃球打到斷手要打石膏。
稱讀男校好dry
1970年至1977年喺皇仁讀書嘅馬Sir同八方講，以前讀書時係領袖生，但時不時走堂去踢波，加上讀男校好dry，成日去隔籬校𥄫女，但嗰陣學校傳統保守，馬Sir始終冇成功追到女仔。原來馬Sir係典型運動健將，攞過陸運會甲組全場冠軍，話中學時全力以赴嘅運動精神，成為佢做人做事嘅宗旨，直至加入警隊，仍然以此為工作原則。
馬Sir被問到有冇期望師弟入警隊？佢話師弟做到自己鍾意做嘅嘢就得；至於𠵱家後生仔想唔想入警隊呢，就係同學仔自己知自己事喇！
1963年至1970年喺皇仁讀書，為官時有骨精強外號嘅黎慶寧乖仔啲，最鍾意打籃球，但印象最深係負責首屆聯校學生報《文苑》嘅英文編輯工作。佢唔似馬Sir，冇試過走堂，亦冇追女仔，淨係成日上堂瞓覺，但就因此識到一班志同道合嘅好朋友，包括𠵱家嘅社運前輩，但佢唔肯講係邊個。兩位重量級校友都話，希望師弟能夠秉承皇仁傳統，文武雙全。
李八方
mailto:[email protected]