民建聯葉國謙唔再喺9月換屆選舉中嘅傳統區議會界別爭取連任，個黨都要搵人接棒出戰。面對唔少年輕區議員對此議席虎視眈眈，仲玩欽點點會掂？所以佢哋今屆破天荒就此議席搞黨內遴選，由黨內區議員票投心目中理想人選。
最終4個區議員包括陳學鋒、劉國勳（圖）、洪錦鉉、鄭泳舜入閘爭凳仔，早前內部仲有簡介會，畀佢哋講述參選理念。投票前日結束、噚日點票，八方聽聞北區區議員劉國勳得票最多，力壓獲葉國謙推薦嘅陳學鋒。
係咪等於劉國勳出征在即？又唔係喎，因為仲要先等中委會喺29號會議確認選舉結果。八方問過劉國勳，佢話等中委會確認結果後再講。34歲劉國勳係忠實梁粉，唔知係咪會支持梁振英連任呢？