由宋仲基、宋慧喬、陳久跟金智媛主演嘅KBS人氣劇《太陽的後裔》昨晚播出第9集，承接上星期講到姜暮煙（宋慧喬飾）錄俾劉時鎮（宋仲基飾）嘅告白錄音意外播出，姜暮煙立即去拎番個電話之後走人，而劉時鎮當然唔放過佢追上前啦！不過姜暮煙就冇立即認心意，搵藉口閃開，劉時鎮就冇再追上去，不過就笑晒口咁話：「好可愛」。而軍人同醫療隊嘅人就當然不時拎姜暮煙嚟開玩笑啦。
而以前一直避開尹明珠（金智媛飾）嘅徐大英（陳久飾）今集終於唔再避開對方，反而主動行近尹明珠，似乎暗示二人關係漸漸明朗。
告白錄音播出之後，姜暮煙就一直避開劉時鎮，而劉時鎮又開始出招撩女：「無論點，反正係我喜歡你更多，另外，今日望你又更加靚。」不愧被封「撩女」大尉！
之後二人揸車出去時唔小心誤入地雷區，劉時鎮為帶領姜暮煙安全離開地雷區，二人當然會扶腰、攬攬等親密接觸，之後二人喺車上再次肯定心意，肉緊咀嘴。