打吡賽馬日，沙田馬場有車水馬龍之盛，左丁山到了廂房還未坐下，已收到S報營業及市場總監W短訊：「你在那裏？」此日早知酬酢繁忙，於是買定現金券，預先投注幾場過關，準備第一至第五場都四處交談，無時間臨場刨馬及投注。辦妥之後，便走到賽馬會廂房，與總監W見面。W話：「點解廂房內唔見你？」左丁山笑曰：「今日寶馬汽車贊助打吡大賽，在賽馬會廂房（JC Box）請客，包括你們傳媒大報在內，我又唔係人客，冇請柬，點行入賽馬會廂房呀。」W講：「又話有人請你？」係吖，係簡文樂請客之嘛，於是順便帶領總監W到沙田會所六樓一行，簡文樂之冠軍科技包下全層請客，並每位客人送上「愛瑪士」絲質領呔或絲巾，熟客如張宇人、林中麟、陸觀豪等等老友記早有準備，不掛領呔，到場便結上以簡文樂馬匹綵衣為圖案基調嘅愛瑪士領呔，今年顏色為金黃色帶紅，十分搶眼，張宇人更加考究，一早打電話問清楚今年領呔嘅顏色，在家選擇西裝上衣顏色，與領呔互相匹配！
林中麟心水清，星期日早上已看了左丁山GG細語，找出錯處：「喂，你可能寫錯，阿Paul請客已有多年，好似唔係1996年之後。」阿Paul幾分鐘後就走嚟講：「其實我在29年前已經在打吡日請客，到咗第9年，自己隻馬『先見之明』就贏咗打吡。左丁山你要寫明呢一點。」當然一定照辦啦，有位老友問佢：「點解20年來唔見你再有馬參加打吡大賽呀？」阿Paul十分坦白咁話：「想贏唔係咁易，我試過聽練馬師講，用二千萬元買咗兩隻馬，一心預備贏打吡及級際賽，點知兩隻馬未曾出過場就因傷退役，之後我都係買馬順其自然，碰吓運氣就算，唔再強求。」在馬圈行走多年之人，一定同意Paul簡之言，近年有內地富豪成為馬會會員，在拍賣會出手勇猛，上一次有一位用850萬買咗一隻新馬，咪又係好快就退役，如果用一千萬買一隻馬就會捧盡大賽獎盃嘅話，賽馬遊戲就冇咁好玩咯。
是日打吡賽，左丁山貼五隻馬，就係首飾太陽、明月千里、威利加道、有得威及冷腳代代為王，馬匹出場時，首飾太陽騎師莫雅突然下馬，要求獸醫檢驗，我哋大呼不妙，雷神此日騎馬大失水準，騎威利加道沿途墮後，入直路冇位，要閃出外欄再追，追鬼咩，於是前四名就係明月千里、凱旋生輝、威利加道、代代為王，左丁山貼五隻，三隻入圍，就係漏咗凱旋生輝，於是無錢收，為之眼光光。