國際冠軍球會盃喺近幾年搞到有聲有色，已經成為夏天球壇盛事，好似一個小型歐聯咁。曼聯喺周二宣佈，會喺今夏去中國參加國冠盃；而賽會噚日亦確定賽程，另外兩支參加中國區國冠盃嘅球隊分別係曼城同多蒙特，其中曼市打吡將會喺北京上演。
李城飛美國鬥巴塞
今屆國冠盃中國區賽事，三支參賽球隊將會喺國內三大城市進行比賽，曼聯同多蒙特七月22日打頭陣喺上海交手；之後25號喺北京「鳥巢」就會上演曼徹斯特打吡，三日後曼城同多蒙特就會喺深圳進行壓軸比賽。不過，到時球隊依舊但隨時面目全非，曼城屆時肯定已經易帥，由哥迪奧拿領軍；至於曼聯到嗰陣仲係咪由雲高爾帶隊，亦都唔多樂觀咯。
至於歐洲同北美區嘅國冠盃陣容仲雄厚，一共有10隊參賽，除咗皇馬、巴塞、拜仁同巴黎聖日耳門外，𠵱家喺英超仲領先緊兼有領隊雲尼亞里料獲加人工至年薪300萬鎊（約3,300萬港元）嘅李斯特城，亦都「升呢」有份獲邀參賽，將會喺美國同聖日耳門以及巴塞交手。
為咗參加國冠盃，有啲球隊可能會面臨賽程塞車。好似利物浦有機會爭到歐霸盃參賽席位，但下屆歐霸第三圈外圍賽喺七月28同八月四日進行；如果成事，紅軍27號先喺美國玫瑰碗同車路士進行國冠盃賽事，一日後就要返歐洲踢歐霸盃，到時高路普都幾頭痕。