賭王何鴻燊四房太太梁安琪前晚帶住超盈同超欣兩個女,出席喺中環四季酒店舉行嘅「2016芭莎藝術玄如之夜」。噚日係四太嘅55歲生日,佢喺現場獲超欣好乖咁攬住媽咪錫錫預祝生日,四太冧晒!
低調慶祝
四太每年生日都係好低調咁過,今年都唔例外,佢都係打算一家人簡單食餐生日飯慶祝,而佢嘅生日願望都係一樣,就係祝願賭王身體健康,佢話:「希望細路仔、最緊要係何生身體健康,錫我多啲、錫小朋友多啲,個個都大、成熟,最緊要讀書好,做嘢有成就。」講到讀書好,梗係要提吓細仔猷君成為最年輕麻省理工金融系碩士生,四太好謙咁話好彩,仲話個仔係遺傳咗賭王嘅DNA。超盈就話之前喺英國買咗份禮物送畀媽咪,最近亦有留意藝術展,啱嘅就會再買畀媽咪。
另外,同場嘅李彩華話自己鍾意畫畫,試過畫畫嚟拍賣,仲有成10幾萬佳績,希望將來可以搞畫展。
撰文:馮仁昭