堪輿學家李丞責同前港姐冠軍老婆劉倩婷結婚3年終於造人成功，BB女阡辰日前喺養和醫院出世，重7磅，母女平安。小阡辰鼻高高夠晒精靈可愛，首次做爹哋媽咪嘅李丞責同劉倩婷梗係開心到不得了啦。
「似我聰明就得」
李丞責噚日喺電話度好興奮咁話：「個名係自己改嘅，所謂一命二運三風水，希望囡囡搵到自己嘅樂土。」李丞責話老婆怕痛，所以今次係擇吉日開刀。原來呢個廿四孝老竇為咗迎接小生命來臨，早喺老婆生BB一個月前已經停工，𠵱家老婆生完BB，佢先開始陸續復工。問佢覺得BB似爹哋定媽咪多啲？李丞責就笑住話：「啲朋友嚟探BB，都話BB似太太多啲，咁個女似媽咪梗係好啦，希望個女似我咁聰明就得㗎啦。」
劉倩婷𠵱家餵人奶，李丞責就幫手換尿片，問佢會唔會送禮物獎勵老婆，李丞責就話：「我同太太講話獎佢再生多個，佢眼都凸埋！其實我想買層樓送畀BB，我睇個市，下半年至出年上半年最適合。」
撰文：馮仁昭
