本周三(23日)第三場四班1650米姚本輝馬房隻「實在威」，不少馬迷對佢又愛又恨，此駒成日追得接近，但跑咗近兩季，始終都贏唔到。好似上場田草1600米由莫雷拉執韁，結果直路一度望唔到空，大熱倒灶只得第9名，真係肉酸。
今次「實在威」初跑快活谷排11檔，帥權落喺郭能手上，預計會係冷門，既然有分頭，大家會否再追一次呢？睇番「實在威」上季曾喺郭能胯下跑入亞軍，當時只輸畀「傲飛星」半馬位，「傲飛星」今季喺三班建功，照計「實在威」冇理由咁水皮喎！
郭能大爆「實在威」原來有個死穴：「『實在威』入閘之後唔知點解會突然分心，注意力分散咗，出閘後要跑一大輪，先會集中番精神，但上星期二我幫佢試一次泥閘，呢個問題大有改善，好快專心競跑下勝出。上季我騎呢隻馬出賽三次都贏唔到，當時都唔太服氣，事隔大半年再騎，四歲馬成長咗不少，但評分反而下降咗，只要克服到11檔，當然有望打開勝門。」