聽到「瓊姐」呢個名，真係令人生畏，但如果唔係高登嗰位，應該冇咁有殺氣！民主黨「琼姐」鄭麗琼（圖），下月22日同公民黨陳淑莊踏台板，上演名為《華麗背後有黑影》嘅多媒體劇場創作。
呢次有10位政界、社運界都熟悉嘅女士，包括去年參選區議員嘅師奶翁愛明、民陣前召集人陳倩瑩、社運界葉寶琳、鄧小樺等參演，作品以「公共領域十條女」為gimmick，講吓佢哋最傷同最威嘅事。八方見到琼姐個名出現喺宣傳海報，以為佢本身都好似陳淑莊識做話劇，原來唔係，佢話係陳淑莊主動介紹佢參演！56歲現為中西區區議員嘅琼姐會喺劇目中講番70年代考唔到升中試嘅「最傷」事迹，又會講吓十幾年前點樣爭取甘棠第成為法定古蹟嘅威水史。