恒安（1044）噚日舉行業績會，主要股東、副主席兼行政總裁許連捷竟然冇上台主持個會，全程坐喺台下玩手機，改由堂弟、首席營運總監許水深擔大旗，不過，許連捷細仔許清池就以執董身份，首次上台列席。
早有傳聞話，年過花甲嘅許連捷準備退休，仲話會搵堂弟許水深做接班人。噚日佢就強調，只係畀機會其他管理層學嘢啫，許清池亦補充多句，指阿爸唔係讓位畀佢。
講番許公子，只係剛剛三十出頭，喺倫敦大學法律系畢業，之後喺當地國際銀行工作。許清池喺2008年加入恒安工作，噚日正式有份主持業績會。不過呢位富二代已經封盤，佢係已故遠東創辦人邱德根孫女、邱詠賢（Wendy）嘅丈夫，佢哋喺2010年擺酒結婚了。