求驗客手記︰
美斯原來射爆皇馬迷

美斯周日西甲聯賽作客維拉利爾勁射省中女球迷，西班牙電視台事後搵到呢位叫拉基爾（下圖）嘅女球迷，佢手腕骨俾美斯省到骨折，要打石膏養傷一個月。拉基爾就話巴塞會方都有聯絡佢，話會提供協助，拉基爾本身係皇馬球迷，佢就要求巴塞畀張下場主場對皇馬嘅國家打吡波飛佢，希望巴塞又唔會安排佢坐龍門後面嘞。

另外美斯、迪馬利亞等阿根廷主力已經歸隊，準備周四作客智利嘅世界盃外圍賽，佢哋亦都順便影埋國家隊新波衫威水相。