花旗調查，只計流動資產（現金及股票），本港千萬富翁人數舊年多咗半成，人數去到5.9萬人，其中17%千萬富翁從股票賺錢。既然金魚缸製造到咁多千萬富翁，管理呢個場嘅人又點會袋得少呢？
港交所（388）最新年報顯示，單係舊年，總計有3位董事與8位高級管理人員，薪酬連股份報酬超過1,000萬元。最高嘅，自然係行政總裁李小加。李小加自從2010年加入港交所後，總報酬（薪金、花紅連股份）絕對唔「小加」，由1,849萬元起，增至舊年4,522萬元，6年間加幅達1.4倍，合共收取1.9億元。
李小加值唔值呢個價，留待市場判斷，不過港交所股價喺李小加入主後，由146蚊升到噚日收市186蚊水平，升幅未夠三成。