李克勤唱廣東歌再奪湖南衛視《我是歌手4》第一！據知，將於後日播出的第11集節目，克勤再唱廣東歌《我不會唱歌》獲第一，李玟唱《Bad Romance》獲第二，容祖兒唱《Bad Boy》獲第三，總計成績，克勤、李玟、黃致列和徐佳瑩率先殺入總決賽，祖兒因排名較後未能直接晉級，要在突圍賽爭出線！
今次克勤是繼第三集演繹《遙遠的她》後再奪第一，他接受本報電話訪問說：「其實今次冠軍比起《遙遠的她》更加得來不易，去到𠵱家個個都出全力耍大招，攞到呢次嘅開心比第三集更加多。」問到有否信心攞總冠軍？克勤說：「之前set咗成績線，如果入到決賽已經好好，好似未試過香港有男歌手入到決賽，自己覺得合格咗先囉，起碼唔好失禮，當然希望攞到更加好成績，會盡力而為。」
對祖兒有信心
問到是否會繼續選唱廣東歌？克勤說：「今次選曲有鋪排，開頭想將經典廣東歌介紹畀內地觀眾，去到中間就唱國語歌，最後希望可以將廣東歌再次介紹，上集夾咗C AllStar唱《天梯》，希望將近年我覺得最好聽嘅廣東歌介紹畀內地觀眾，最後《我不會唱歌》可以話代表自己，佢哋好想我唱《紅日》或《月半小夜曲》，但我覺得呢啲歌內地觀眾已經知道，《我》因為廣東話關係，北面觀眾唔係好知，希望將呢首帶古典味歌曲帶畀內地觀眾，自己一直等郎朗個期，今次再攞第一，郎朗係佔好大功勞。」
問到會否擔心祖兒被淘汰？克勤淡定說：「一啲都唔擔心佢，佢喺我心目中，決賽已經book咗位，我覺得佢一直表現好好，只係唔好彩整傷咗腳，但都攞第三，我攞過兩次冠軍，亦曾經有機會被淘汰，相信喺決賽一定見到佢。」
採訪：皓騫