Google旗下人工智能（AI）AlphaGo擊敗南韓棋王李世乭，大家都諗AI將來會否連打工仔嘅飯碗都搶埋呢？喺AI殺埋身前，各行各業先紮行馬，迎接數碼轉型挑戰。《哈佛商業評論》前日引述一個調查，訪問超過2,000位來自15個行業嘅「C級」高層，即係行政總裁（CEO）同財務總監（CFO）等，未來一年最擔心並非AI，而係數碼時代衝擊。
調查結果指，最受數碼時代影響嘅行業，第一位係傳媒，第二至第五分別為電訊、消費金融服務、零售同科技。有九成嘅「C級」高層話，公司設有數碼化策略，另有一半人話公司搵啱人才，配合數碼轉型。
不過，企業行數碼化始終困難重重，除咗行業競爭大，亦過於依賴傳統經營模式。份報告就建議佢哋可以搵新血加速轉型、建立數碼文化同貫徹轉型嘅決心。