立法會新界東2月舉行補選後，今年9月換屆改選勢必更熱鬧。早前表明「仲有團火」、積極考慮再戰新東嘅前立會議員鄭家富，過咗近兩個月後，決定放棄出山喎！唔係怕輸啩？咁諗就太唔了解呢位鄭小班嘞。
想畀年輕一代接棒
阿富話比例代表制下，佢若加入戰團，一定導致現任新東議員嘅新同盟范國威或人民力量陳志全敗陣，為咗顧全大局，決定唔去馬。本身係天主教徒嘅阿富早前去咗朝聖，其間有所頓悟，同老婆商量後，覺得應畀番多啲時間屋企人。
除咗家庭因素，佢話新東補選後，覺得公民黨楊岳橋同本土民主前線梁天琦都能清楚表達理念，有感民主派要畀年輕一代接棒：「我唔好去攪亂個局……應該畀啲新思維進入議會，但當然唔係畀黃成智啦！」
當然唔好忘記，政治現實係比例代表制，多張名單票源隨時遭分薄攬炒，阿富承認自己若去馬，咖喱范或慢必其中一個一定會輸，加上學民仔嘅新政團及本土派都話要選，而佢支持戴耀廷嘅雷動計劃，為保住泛民喺直選嘅議席，決定唔出山。
阿富唔選，係咪代表咖喱范唔使去選超級區議會，留番新東老巢？阿富話，知道咖喱范話要去選超級區議會後，惹嚟好多人鬧，因為咖喱范等人係不滿民主黨支持超級區議會而退黨，佢話等佢哋自己諗吓。
咖喱范未決定選超區
咖喱范就強調新同盟選唔選超級區議會仍係未知數。佢話近日開始落區，噚日就喺自己選區收集意見，睇吓市民點睇出選超區，形容意見兩極，未有定案㗎！
李八方
mailto:[email protected]