牙買加飛人保特嘅教練米斯之前話過，呢個手執六面奧運金牌嘅跑手應該可以玩埋2020年嘅東京奧運，但係保特就喺周一親口證實，今夏里約熱內盧奧運，將會係佢最後一次嘅奧運。
現年29歲嘅保特周一接受外國通訊社訪問嗰陣表示，佢嘅奧運生涯會喺巴西里約熱內盧馬拉簡拿運動場落幕，唔會去日本玩埋2020年東京奧運。外號「閃電」嘅保特話：「今屆肯定係我最後一次玩奧運。要keep住動力玩多四年真係好難，特別係如果我可以喺里奧攞到想要嘅嘢。」
保特喺2008年北京奧運同埋2012年倫敦奧運合共贏咗男子100米跑、200米跑同埋4x100米跑接力六面金牌，佢話希望可以喺今年八月舉行喺里奧攞多三金，令自己成為九金王。佢咁講：「我最大嘅夢想係喺奧運贏多三面金牌。奧運金牌係我嘅目標同埋夢想，所以我好想做好，而且亦會一心一意去做好。」
最想19秒內跑畢200米
本身係男子100米同200米跑世界紀錄保持者嘅保特，同時希望喺退休前創造歷史，成為首個喺19秒內跑完200米嘅人。計劃喺2017年倫敦田徑世錦賽後告別田徑場嘅佢表示：「我希望可以喺19秒內跑完200米，呢樣係唯一一樣我好想好想去做嘅嘢。」